HONG PAI BAIH DING!

Posted on Saturday, March 22, 2014by
March 22
Kigin ni

HONG PAI BAIH DING!

SIMDING:
Mangmuhna 22:7-21

Kong pai baih taktak ding hi.–Mangmuhna 22:20

KUMTAWN LAI SIANGTHO:
Joshua 10-12
Luka 1:39-56

Kingah baih ding!” cih kammal pen kimawlna le a lawp-huai hunte, vanzatte a kigen ciang kizang zawdeuh hi. A gennopna in lam-etna piak ding, leh bang hong piang ding cih genkholhnate kha khat bang a kisap ciangin a kigen theizel kammal zong hi.
 
    Ahi zongin Mangmuhna laibu i sim tak ciangin “Kingah baih ding” cih kammal tawh a kibang “Hong paibaih ding” cih i mu-a, i diipkua hi. “Nikhat ni ciang, hun sawt pian khit ciangin Jesuh hong pai ding” cih hilo-a, “tua thute hong piang baih mahmah ding (1:1), leh “a hun hong nai mahmah ta hi” (tg. 3) cih bangin kipulaak hi. Atawpna lam bangah Topa in, “Kong pai baih ding hi” (Mang. 22:7,12,20) ci-in thumvei sitset gen hi. Tua kammal pen ei’ tel theih bangin a khiakik ding hileng, “Hong pai mengmeng ning,” “Hong manlang ning” leh “Kong pai laitak hi” ci-in khiatna nei tek ding hi.
 
    Tuma kum 2000 laipekin bang hang hibang kammal na kizang hiam? “Baih ding” cih akhiatna in hun tawh a kisailo maw leh?
 
    Topa hong paikik ding hun le ni na ngaihsutsut sangin, Ama’ kamciamnate hong tangtung ding cihte i lungsung ah lungngaih zawk ding ahi hi. Eite Ama-a ding a nungta dingte i hi-a, “Hong honpa Jesuh Khris hong paikik ding a lam-ente i hihi” (Titus 2:13). – David MacCasland 

A lamdang tangthu i pua,
Lungdam huai thu gen ding,
Topa’ kammalte puakin,
Jesuh hong pai baiih ding! – Peterson

Jesuh, tuni hong pai ding bangin nungta in.

TUDONG SEMLAI

Posted on Friday, March 21, 2014by
March 21
Ninga

TUDONG SEMLAI

SIMDING:
Matthai 25:14-21


“Ahoih acitak nasempa aw” –– Matthew 25:23

KUMTAWN LAI SIANGTHO:
Joshua 7-9
Luka 1:21-38

Vivian le Don-te pen a kiteenzawh uh kum 70 bang hita hi. Tunai-in Vivian pen pheiguh natna thuak ahih manin zawngkhal pianta hi. Tua ahih  manin Pawlpi sung nasepnate ah Don le Vivian hunbit-in kihelzo nawnlo uha thanem kisa mahmah ta uh hi.
 
   Ahi zongin Vivian le Don-te Topa’ nasepna ah kihel lai veve uh hi: amau pen thungen-in mapang uh hi. A Pawlpi uh ah a pumpi-in a va kihel theih nawnloh uh hangin, Pasian’ nasepna dingin a nunglam kiu khat-ah ahih theihzah-un mapang veve uh hi.
 
   Matthai 25 sunga i muh talen tawh kisai, Pasian’ hong piak letsongte zatkhiatna ngaihsun pha ciat ni. Eite in Pasian’ hong piak siamna le hih theihnate siitlo-in, i neih zahzah lei-ah phumlo-in, zangkhia lo-in om kei ni.
   
 I thahat lai teng bek Pasian in hong zang ding ci-in kingaihsun tuan kei in. I khangno lai le uhaam khit, i cinat laitak i zawngkhal laitak nangawn hong zang nuam hi. Vivian le Don-te in thungetna tawh mapang lai uh hi. Amau mah bangin eite in zong i hih theihna tek tawh hong honpa i pahtawi thei hi – “ei’ siamna bangbang” (tg. 15) tawh a kilawm Topa’ nasem ciat ni. – Dave Branon

Topa, kei-a ding na tampi nong sepsak khin hi.
Na na kong sepsak theih nadingin hong hilh in –
Nong piaksa siamna tawh ka hih theihzah-un
hong ki-ap ung. Ka nuntakna uh nang minthan nading
a nungta biakpiakna hong hisak in.

Topa’n na kiphal nakleh – kum kiciangtan lo-in hong zang nuam hi.

IT KHIAL

Posted on Thursday, March 20, 2014by
March 20
Nili

IT KHIAL

SIMDING:
Late 115

Tua milimte pen ngun le kham tawh kibawl hi-a, mihingte’ bawlsa ahi hi.––Late 115:4

KUMTAWN LAI SIANGTHO:
Joshua 4-6
Luka 1:1-20

Laigelh le thugen siam Martin Lindstrom in cellphone-te pen aneite adingin lawmhoih khat suak khinta hi, ci hi. Lindstrom in a thu cingtakin a kantelsa ahi hi. Atawi mi peuhmah in ama’ phone a gin’ ciangin, a simal samalte hong tho-in a itna le lungnopnate hong kahto han-han hi. Lindstrom in, “Tua bang hun laitak pen a ngaih penpen lawm numei, pasal, ahih keileh nulepa tawh kimu bangin kituat uh hi” ci-in gen hi.
 
   Leitung ah na tampite i hunpia-in i lunglut kha thei mahmah hi. Tua bang hun ciang koi-ah lungtu pen ihiam, cih i kidot ding hoih hi. Joshua in a mipihte kiangah Pasian khat bek biak dingin na to hi (Josh. 24:14). Tua in a kiim apaam aa om gamte’ biak milimte biakloh ding thuhilhna hi. Hih milimte pen mite’ bawlsa hi-a sik tawh kibawl hi (Late 115:4).  Tuate pen vanglian Topa tawh teh leng, bangmahlo ahi hi. Tua ahih manin Pasian in a mite ama’ bitna sung bekah bukna a ngah ding hanthawn hi (Thukhente 10:13-16). Jesuh in tua thu mah na genkik a: “Na Topa Pasian, na lungsim khempeuh, na nuntakna khempeuh, le na pilna khempeuh tawh it in” (Matt. 22:37).
 
    Eite hong huh, hong dal pen Topa bek ahi hi (Late 115:9). I biakna khempeuh amah bek pia ni. – Marvin Williams

Ngaihsut beh ding:
Tunai sawnga na sep khempeuh ngaihsun kik dih in? Pasian sangin na thupitsak zawk van le nate a omkha hiam?

Pasian pen i deih masak pen hisak den ni.

VANTUNG NOPNA

Posted on Wednesday, March 19, 2014by
March 19
Nilai ni

VANTUNG NOPNA

SIMDING:
Luka 15:1-10

Mawhnei mi khat Pasian kiangah hong kihei kik ciangin vantung mite nuam mahmah uh hi.–Luka 15:10

KUMTAWN LAI SIANGTHO:
Joshua 1-3
Mark 16

Joann pen Khristian innkuan panin khangkhia hi. College a kah tak ciangin, a upna peengin Pasian’ thu kin nawnlo hi. Buaih a lak khit ciangin, gam tampi ah khualzin a, lungnop nadingin zin kawikawi napi lungkim zo tuanlo hi. Haksatna a phutkhak ciangin Pasian in amah a sam ahihna kitel kik a, Pasian hong lunggulh kik hi.
  
  Germany panin Joann in US aa om a nulepate hopih-a, “Kei’n ka nuntakna Khris tungah piata ing, amah’n ka nuntakna hong kheel hi! Hong lungkhamsak ka hih manin ka lung nuamlo hi” ci hi. Tua thu a zak ciangin a nulepa in a sanggamte teng kaikhawm hi. Tua thu lamdang amau tungah a gennuam lua ahi hi. “Na sanggamnu in  Jesuh Khris hong sangta hi!” ci-in khitui mualtuangin gen hi.
 
    Luka 15 sunga dangka mansuahnu in a muhkik ciangin a veeng le paamte tungah gen-in amah tawh a lungdam khawm dingin zawn hi (tg. 9). Jesuh in hih taangthu, tuu mang, tapa taimang taangthute a gen ciangin biakna thu hahkat a kisa mite tungah leitung ah a mangthangte zong dingin hong pai ahihna pulaak nuam aa, a gen ahi hi. Pasian hong piak gupkhiatna i saan tak ciangin, leitung le vantung ah lungdamna omkhawm hi. Jesuh in “Mawhnei mi khat a kisik tak ciangin Pasian’ mi siangthote zong lungdam uh hi” (tg. 10) ci hi. Jesuh, eite omna mun dong hong pai-a, eite in i saan theih tak ciangin vantung ah lungdamna kibehlap ding ahihna i tel hi! – Anne Cetas
 
Ka va gammang mualtung khua dam lak-ah,
Inn pan gamlapi ka pialkhin;
Tu’n hong la in, hong ciahpih’n Na inn ah
Hong Honpa hong pai in. – Crosby

Eite kisik-in i om ciang, vantung mite lungdam uh hi.

GIM NAMTUI

Posted on Tuesday, March 18, 2014by
March 18
Ninih

GIM NAMTUI

SIMDING:
2 Korin 2:12-17

Eite pen tatkhiatsa mite tung le mawhnei mite-a dingin Khris’ namtui na a phuangkhia Pasian’ mite i hi hi.––2 Kor. 2:15

KUMTAWN LAI SIANGTHO:
Thuhilhkikna 32-34
Mark 15:26-47

Gimnam pawl khatte pen kimangngilh theilo  hi. Ka lawmpa’n zong a zat ngei cream hong bei kuanta ahihlam hong lak hi. Kei’n zong ama kiangah, “hong leisak ve ning e” ci-in ka gen hi. Tua ciangin amah’n “Hih dante mah hong leisak in” ci-in bung khat hong lak hi. Amah’n “hih gimnam bek deih ing – hih pen ka pa’n zong a deih mahmah gimnam hi” ci-in hong genbeh hi. Kei zong ka simnuih giugiau hi. Ka neulai-in ka nu in ka lu hong sawpsak ciang a zat shampoo gimnam zong ka phawk hi. Tua gimnamtuite in ko tawh hong omkhawm nawnlo mite hong phawksak bangin ka ngaihsun uh hi.
 
    Oliver Wendell Holmes in, “Phawkna, a beisa hunte ngaihna, lawm le gual lunggulhna cihte pen a dang hang hilo-in gimnamte tungtawn pan hi,” ci hi.
 
   Tua hileh, i nuntaknate in Pasian lamah mite a paipih gimnam bang ahi kha diam? 2 Korin 2:15 ah “Hotkhiatna a ngah mite leh a ngahlo mite lakah kote pen Khris in Pasian’ tungah a piak paknamtui tawh ka kibang uh hi” ci hi. Ei’ namtuina pen Pasian ading hoih a,midangte a zol ding le a hawlkhia ding zong hithei hi.  Jesuh’ hong kipiakkhiatna i telkhit ciangin – eite in midangte Khris kiang atun ding namtuina hong guatte i hihlam kiphawk ni.
 
    Khris tawh kisutna tua gimnamtui i neih taktak ciangin midangte in Honpa muhnopna lungsim khang han-han sak ding ahi hi. – Cindy Hess Kasper
 
Ka pheiphung hong zang inla, Nang ading ngalhat sak in;
Ka aw zong Nang tang inla, Ngaihtak na min phatsak in
Ngaihtak  Na min phatsak in. –  Havergal

Topa tawh i tonkhop ciangin, midangte in a zuih ding namtuinate amaute tungah a suan toto i hi hi.

MEEITE NUNGNGAT-IN

Posted on Monday, March 17, 2014by
March 17
Nipi Khuavak

MEEITE NUNGNGAT-IN

SIMDING:
Job 3:3-5; 42:5-6

Nidangin nangma’ thu ka za zel a... tu-in ahih leh kong mu taktak hi.___Job 42:5

KUMTAWN LAI SIANGTHO:
Thuhilhkikna 30-31
Mark 15:1-25

1927 kumin “Wings” a kici film (video) pen galpi khat hunlai-a American huihlak galkap nihte’ tuahkhak thu a zaihkik hi-a, lim hoihpen Academy zong ngah hi. A zaih laitakin kisuahkhia lo thapai hi. Director pa tungah tua thu kidong hi. Amah in: “A kimu thei pen huihlak hi-a van dumpi bek kimu hi. Tua huihlak thu pen meei om keileh muhnoplo ding hi. Meeite in i etdan hong lemsak mahmah hi” ci-in gen hi. Tua bang acih pen man mahmah hi. Meeite nungngat-in vanlai-ah a kizaih film pen a en mite in muhnopsa uh hi.
 
    Khat veivei meeikaai a om sangin van-siang peuh hizaw leh i deih hun tamzaw hi. Ahi zongin  meeikaaite in Pasian’ thumanna kilangsak zaw hi. Haksatna a omzawk deuh ciangin Pasian in nasem hi,, cih i tel thei zaw tektek hi.
 
    Haksatna a tuah tuungin Job in: “Ka suah ni beimang hen!... Tua ni-in meeipi ziing henla, tua ni awkin valh tum hen” (Job. 3:3-5) ci hi. Tua bang lungkiatna pen Pasian in a gencian masiah thuak keeikaai hi. Tua ciang Job in, “Nidangin na thu ka za ngei-a .... tu-in ahihleh ka mit mahmah tawh kong mu hi” (42:5) ci hi. Job pen vanglian Pasian tawh kitalsik kha hi. Tua ahih manin a muhna hong kikheelta hi.
 
   Tuni-in haksatna meeite in na muhna hong khak hiam? Na upmawhna sangin Pasian in tua meeipite in na muhna hong kilamdangsak ding hi. – Dennis Fisher
 
Pasian in na leenna ding kha hong guan
Na muhna meei tung ciang va dakto in,
Van lai-ah va leeng inla,
Topa’ hoihna le itna va mu in. – Sper

Khat veivei lungkhamna meeite in Ama’ hong itna maitang hong kilangsak zaw hi. – Jasper

LUNGSIM AN

Posted on Sunday, March 16, 2014by
March 16
Nipi Ni

LUNGSIM AN

SIMDING:
Jeremiah 15:15-21

Na kammalte ka muh ciangin, keimah in ka ne hi.––Jeremiah 15:16

KUMTAWN LAI SIANGTHO:
Thuhilhkikna 28-29
Mark 14:54-72
An ka duh hi! Hoih taka kihuan, neek ding cih pen ka uuk ngiat khat hi. Keima’ duh dan bang hileh, ka neek ding zah sangin zong tam ka ne nuam zawlai hi. Ka thauluat ding zong ka dah zel hi. Tua ahih manin ka zi Martie in cidam nading tawh kisai, an neekzah ding hong gen gen theizel hi. 

    Jeremiah’ kammalte ngaihsut huai mahmah hi. Topa’ thute a muh ciangin, tuate ne hi (Jer. 15:16) – anduh tuiduh bangin tua thute ne ding cih ka ngaihsut ciang lamdang ka sa hi.
 
   Jeremiah in bel Pasian’ kammalte aneek taktak loh lam ka thei hi. A gennop bulpi in a thute simin a lungsim tawng-ah lungngai phakik hi, cih agennuam hizaw hi. Tua pen Pasian’ kammal i sanzia ding hong hilh ahi hi. Tua thu pen i lungsim adingin an taktak hi! I valhsuk tak ciangin, Kha Siangtho in Jesuh tawh i kisut semsem zawh nading tha hong pia hi. Tua thute in Pasian, sum le neihsate, i galte, nasepna, le innkuan  nuntak cih bangte bangci ngaihsut ding cih hong hilh hi. Tua hi-a, tua thute pen ei-a dingin hoih mahmah hi.
  
  Tua ahih manin na lung a taii theih nadingin tua kammalte ne in! Tua hileh, kamsang Jeremiah bangin “Na kammalte kei-a dingin lungdamna le kipaakna hong piangsak hi” (15:16) na ci ding hi. – Joe Stowell 

Topa, na thu ka neeknop na ding kamlimna hong guan in. 
Na thute kei-a dingin kha an taktak ahi hi. 
Tuate ka sim zawh nading, ka valh zawh nading, 
 tua tungtawna ka ngah dinguh tha le ngalte, 
ka pum le ka kha-a ding hong hi tawntungsak ta in.

Na ankuang umna ah Pasian’ kammal a kihel leh, cidamin na om tawntung ding hi.
Subscribe to: Posts (Atom)