A KIKHEELSAK VANGLIATNA

Posted on Saturday, March 08, 2014by
March 8
Kigin ni

A KIKHEELSAK VANGLIATNA

SIMDING:
Thuhilhkikna 6:4-9

Tuni-a kong thuhilh-nate na lungsim sungah koih den in.–Thuhilhkikna 6:6


KUMTAWN LAI SIANGTHO:
Thuhilhkikna 5-7
Mark 11:1-18


Mi pawlkhatte in amau’ theihna a khangsak ding kimawlnate paakta mahmah uh hi. Tunai deuh-in, ka lawm khat tawh Lai Siangtho dotna ka kidong uh hi. Ka zum sung panin ko tutna tek pan a kidong ka hih manun, ka gei-a omte in ka kidotna uh zong hong zakpih hi. Ka kidotna uh pen Noah’ teembaw pan Samaria numeinu dong huam ahih manin, a thei khempeuh in hong kuppih uh hi. Tua zum sunga om khempeuh in amau’ theih bangbang hong dawng pahpah uh hi. 

    Lai Siangtho thu theihna in thupi hi, ahi zongin Pasian in amah tawh i kizop theih nadingin athute i lungsim sungah koih-in i nuntakpih ding hong deih ahi hi. Kha Siangtho in tua thute zangin Khris tawh i kisut theih nading hong hilh hi (Efesa 4:20-24). A thute i lungsim sungah i koihna ciangin: nopna le lawpna (Jer. 15:16); khalam gualzawhna (Josh. 1:8); kha galdona ah galhiam (Mat. 4:1-11); kipuahphatna (2 Tim. 3:15-16); i lampi ah khuavak (Late 119:105); haksatna ah pilna tawh gualzawhna (Pau. 1:1-2); leh upna hong khangsak (Rom. 10:17) hi.
  
  Lai Siangtho thu i theihkhom ciang ding tawh i simleh, kha lam kiphatsakna hong piang lel ding hi (1 Kor. 8:1). Ahi zongin Kha Siangtho in i nuntakna ah tua thu tung tawnin na hong sep tak ciang, i nuntakna ah haksatna kigualzo thei-in Pasian’ itna taktak i thukkik thei hi. – Dennis Fisher
 
A thu ka lunggulhna hong cingsak;
Tua thu hangin nuntakna khomun ka ngah;
Ka dangtaak nawn kei, Ama’ itna hangin,
A bei theilo hehpihna tawh, kei hong sikh. – Sanders

Laibu tampi takte in na theihna hong khangsak dinga, Lai Siangtho in na nuntakna hong kikheelsak ding hi.

KAMPHEN KULLO

Posted on Friday, March 07, 2014by
March 7
Ninga Ni

KAMPHEN KULLO

SIMDING:
Rom 8:19-27

Kha Siangtho in a mi siangthote adingin Pasian kiangah thuumna hong neihsak hi.
–Rom 8:27

KUMTAWN LAI SIANGTHO:
Thuhilhkikna 3-4
Mark 10:32-52

Kum tampi sung, minam tampite tungah Lai Siangtho sung thu ka hilh khazel hi. Mangpau bekin ka pau thei-a, thungai mite tel theih dingin kamphen khat tawh ka kithuah ciang amau, kei’ gennop tel pan uh hi. Tua kamphente siamna tungtawnin ka thugente a tel ding uh ahi hi. Indonesia kam, Malaysia kam, Brazil kam cihte tawh kam hong phensak mite in ka kampau pen siangin kician, ci-in hong gentek uh hi.
 
   Kamphen nasep pen Kha Siangtho’ nasep lian khat hi, ci-in ka phawk sansan hi. Thu i nget ciangin, koici bangin thungen ding cih zong i theihloh hun tampi om hi (Rom. 8:26). “Kha Siangtho in Pasian’ deihna tawh kizui-in Pasian’ mite-a dingin hong thuumsak ahih manin mihingte’ lungsimtawng thu a thei Pasian in Kha Siangtho’ ngaihsutna a thei hi” (tg. 27).  Pasian tungah thuumna i neih ciangin Kha Siangtho in hong huh hi. Kam hong phensak hi. Eite’ kisapna amah’n hong genpih hi.
 
    Lungdam huailua hilo hiam! I lungsim ngaihsutna hong theihpih bek hilo-in, thu i nget ciangin hong panpih dingin Kha Siangtho zong hong pia lailai hi. Tua ahih maniin i thungetna peuhmah beikhong, valkhong  lo hi, ci-in i tel hi. – Bill Crowder
 
Topa, lungdam ing. Kha Siangtho nong piak manin. Nang deih bangin thu ka nget theih nading Nang mah in nong huh tawntung hi. Tua manin ka lungmuang hi. Nang deihna tawh a kituak ngaihsutnate ka pomkhak theih nadingin na lampi hong hilh in.

Kha Siangtho hong panpihna in Pasian’ deihna bangin thu i nget ding hong panpih hi.

TAKSAI!

Posted on Thursday, March 06, 2014by
March 6
Nili

TAKSAI!

SIMDING:
Isaiah 30:1-5,18-19

Topa in na kahnate hong za-in hong hehpih a, Amah in hong dawng hi. ___Isaiah 30:19

KUMTAWN LAI SIANGTHO:
Thuhilhkikna 1-2
Mark 10:1-31

Nulepate in a taneute tawh a kimawl ciangin phawnna limte zang thei zel hi. Pate in a tate mai-ah dingin a khutme tawh a maitang hum-in tua  khit ciang, “Taksai!” ci hi. Tua naungeek  pen nuamin nui keuhkeuh bek hi.
 
    Kilausakna pen a nop mahmah kimawlna khat hi citciat a, naupangte zong bel hong lauthei takpi pah mawk hi. Tua bang hun ciangin nuihna hong piang samlo hi. Amasa pen launa in nulepa tawh kikhenna ahi hi. Naupangte nulepa tawh hong  kigamla-in, amau utna lam zuan uh hi. A paina ding mun a theih nawnloh tak ciangin kapkhia hi. Tua ciangin nulepate zong hong pai-in a lau loh nading gen uh hi.
 
    I khantohtoh tak ciangin, i launa ding hong tamzaw semsem-in, laibu simna, video etna, kimawlna muna limte ... Tua bangte lauhuai hi, ci-in thei napi hang, tuate a kihta lo bang khatin va sim nuam, va ennuam, va sinnuam hi hang.
  
  Launa hun hong tun ciangin, taanglai Israel mite bangin (Isai. 30) ei le ei kithei-in, hong it Vanglian Pa kiang i zuan hi. Lauhuaina hong tung ahih manin cihna ding meel theilo-in i om hun tam mahmah hi. Tua bang hun ciang i kammalte zong a zaknop, a ngaihbang kammalte kizanglo-a, lungkiatna kammalte kizangkha zaw hamtang hi.
  
  Topa in Ama’ itna anglum sungah hong omsak nuam den ahih manin hong dawng pah-a, tua mun ah eite in lungmuang takin bukna bit i ngah hi. – Julie Ackerman Link
 
    Kei bek hikeng, Khazih kei tawh hong om;
    Ka lawm hoih peen Amah bek hi;
    Tua bang lawmpha kei hong hehpihin hong huh,
    Kei, kei bek lam a pai hikeng. – Ackley

Pasian’ muanhuaina i muan tak ciangin i launa teng thengmang hi.

Kei le Ka Pa

Posted on Wednesday, March 05, 2014by
March 5
Nilai  ni

Kei le Ka Pa


Simding:

Matthai 9:35-10:1


Topa Pasiani n tua mipa Eden huan cing ding le puah dingin koih hi.---Piancil 2:15

Kumtawn Lai Siangtho:
Gamlakvakna 34-36
Mark 9:30-50


Ka lawm khat in a inn nungah suang cian nasep ni khat sung tawntung sem hi. Kum 5 apha a tanu in huh ding a gen ciangin, nong huhnop leh la hong saksak in ci-in gen hi. Amah utlo hi. Huh nuam cih hipong hi. Tua ahih manin a pa in a tanu koih ding suangte a khut tawh dompih-in kahlei dan khat bawlpih hi.

Tua a tanu in huh keileh, hun tomno sungin man ding hi. Ni khat sung bang a sep khit ciangin, a tanunu in lungdam kipaaktakin hih bangin gen hi: “Kei le ka pa’n hih kahlei a bawl ka hi ve vua” ci-in annek kawmin gen hi.

A kipatciil a kipan Pasian in mihingte tungtawnin nasem hi. Adam a bawl khit tak ciangin huancing ding leh ganhingte a cing dingin mihing tungah thupia hi (Pian. 2:15-20).

Tua nasep hong kizomtoto hi. Hih leitung ah omna ding mun a kisap ciangin, Pasian in buuk leh Biakinnpite van pan hong khiat lo-a; khutsiam nasem tampite’ pilna tawh tuate kilam hi (Pai. 35-38; 1 Kumpite 6). Jesuh in Pasian gam hong tangko ciangin zong, mihingte in a huh ding ngen hi. Amah in a nungzuite kiangah, “Lonei Topa in nasem ding mi hong sawl nadingin thungen un” (Matt. 9:38) ci hi.

Pa in a tate tawh na asepkhop mah bangin, Pasian in a gam a phut nadingin eite hong zawn hi. – Philip Yancey

Vantung aa om Topa, Nong it manin ka lungdam uh hi. Nangma nong itna, nasepna, hehpihnate mite in a theih nadingun kote nong zang hi. Nang hong huh dingin kote nong zawt ka lungdam lua uh hi.

Pasian in a kiniamkhiat nasemte, Ama’ nasep lian sem dingin zang hi.

Deidan Nawnlo

Posted on Tuesday, March 04, 2014by
March 4
Ninih Ni 

 Deidan Nawnlo

Simding:
James 2:1-10

Sanggamte aw, minthanna vang tawh a kidim Khris umin na om laitakun a pualam pianziate siksanin mi na deidan kei un.---James 2:1

Kumtawn Lai Siangtho:
Gamlakvakna 31-33
Mark 9:1-29

Newsweek Magazine pan 2010 kumin thukanna khat ah: manager 100 ah 57 in amau’ siamna nasep ahih sam hangin a ut luatlohna munah semkha ahih manin haksatna tuak thei uh hi, ci hi. 100 ah 84 in mihaute in nasep siam khinsa managerte bek semsak nuam, ci hi. 100 ah 64 in mihaute in mel le sa en-in nasep guan nuam ci-in gen uh hi. Tua bang nasep kipiakna zong deidanna ahi hi. 

Tua bang maipha kipiaknate pen thu lamdang zong hilo hi. Pawlpi masa hun lai-in zong kimu thei-a, James in na thuhilh hi. Kiginkholh theihna ding deihna tawh James in: “Sanggamte aw, minthanna vang tawh a kidim i Topa Jesuh Khris umin na om laitak-un, mi na deidan kei un” (James 2:1). James in tua bang deidanna pen mizawng le mihaute tawh kikholhna kimu thei ci-in gen hi. Eite upna tawh kituak lo, ci-in zong gen hi. Pasian’ hehpihna zong lamkhialsak thei hi (tg. 9). Itna thu peeng sak a (tg. 8), mawhna zong ahi hi (tg. 9). Tua bang deidanna i zawhna dingin Jesuh’ hong gen: nang le nang na ki-it bangin na veengte na it in, cih lungsim puaciat ni.

Tua bang kideidanna hoihlo i hawlkhiat zawh nadingin midangte tawh i kihozia, i kikholhzia tawh Pasian’ itna kilangsak ding, hong kal ahi hi. – Marvin William

Ngaihsun In:

Midang tawh na kithuah nading bang in nang hong tawsawn hiam? Apuathamte tawh hiam? Jesuh in mite a it bangin koici bangin nang zong it thei ding na hiam?



Jesuh i to-et tak ciangin,  mite kineu-et (suk-et) thei nawnlo hi.
Subscribe to: Posts (Atom)