PULAAK SIAMNA

Posted on Saturday, December 28, 2013by
December 28
 Kigin ni

PULAAK SIAMNA

SIMDING:
Kolose 1:21-23


 Amah tawh i kilem khin-a... mi siangtho, mawhna baanglo, a etlawm dingin hong siam hi.
__ Kolose 1:21-22

KUMTAWN LAI SIANGTHO:
 Zechariah 5-8
 Mangmuhna 19

Ka zi Martie pen meh huan siam mahmah  hi. Ni khat sung bang gim le tawlpi nasem-in ka om ciang, inn a ka zi’ meh huan neek ding pen ka ngaklah den hi. Meh huan siam cih ciang bek hilo-in, a genkhiat dan zong siam hi. Kuang ii mel tawh kizui-in meh-te koih khawm thei-a, sa zong bangci at lehang etlawm ding, buh koizah khah ding, mehteh mehgah-te zong etlawm mahmah mawk hi. Tua-te a kihuan ma-in va sawk kha leng, limna om tuanlo leuleu  hi. Sa pen a sial lai hi-in, buh zong a sial pi-in kine sam lo hi. Anteh-te zong i huanzek mah kul hi.
    Tua bangte ka ngaihsut ciangin Jesuh hong sepsaknate ka phawkkha hi. Ka  mawhna le mawh nopna lungsim ka neihna ka kiphawk  hi. Kei’ hihna bek tawh Pasian’ lim a pua thei ding ka hi kei hi. Kei hong kitankhia a, Jesuh in mithak hong suah hi (2 Kor. 5:17). Ka hi bangin Jesuh’n hong sanga - kei ka hi ding bangin hong bawl hi - “a cidam, a siangtho, paubaanna neilo dingin” (Kol. 1:22). Amah in Pasian’ mai-ah a sanhuai mi ka hihna dingin hong bawlpha hi.
    Pasian’ vangliatna in kei tungtawnin midangte’ nuntakna a kikhelsak dingin keimah hong hisak den tahen. Khris in a tawp dongin hong semsuak ding ci-in zong ka lam-en hi.– Joe Stowell

Jesuh’ hoihna ka sungah kimu ta hen--
Ama’ itna le sianthona!
Kha Siangtho aw, kei hong puahpha inla,
Jesuh, kei tungtawnin kimu ta hen. --Orsborn

I hi bangin Jesuh in  hong sang a, a hibang dingin hong bawlpha hi.

Hen Cipna

Posted on Friday, December 27, 2013by
December 27
 Ninga


HEN CIPNA

SIMDING:
Jeremiah 29:4-14

Topa Jesuh Khris theihna le itna sungah khangcing un.___2 Peter 3:18

KUMTAWN LAI SIANGTHO:
 Zechariah 1-4
 Mangmuhna 18

Kum 86 a phak-in Ken Deal in kum 30 sung bang asep zawh ciang, thonginn sunga gupna thugenna zawh bawl hi. Nipi ni-in a nunung pen thugenna nei-a kolbulh khaukhihna sungah nasepna cih thulu tawh gen hi. Thonginn sunga a tuahkhak thute tungtawnin gen hi. Mite in tua mun taisan nuam mahmah laitak ama’ nasep pen tua mun bulphuh-in Jesuh Khris’ thu genna hi citciat hi.
    Nebuchadnezzar kumpi in Judah mite Pasian’ thuman lohna hangin salin Babylon ah a paipih laitak, kamsang Jeremiah in hih bangin thu na gen hi: “Inn lam unla, a sungah teng un. Huan bawl unla, a sungah na cinte uh ne un. Zipi unla tanu tapa nei un. Na tapate-a ding mo la unla, na tanute uh mo kha un, tua hileh amau in zong tanu tapa hong nei dinga, kiam lo-in na khang ding uh hi” (Jer. 29:5-6).
    Khaktanna tuamtuam zong i tuakkha ding hi.  Ei’ kicinlahna hang maw, ei’ hang zong ahi khollo thute hang zong hi kha thei hi. Ahi zongin Pasian’ tha suangin tuate i nawkzo ding hi. Khaktanna i zawhzawh nadingin thakiam lo-in thahat zawk ding ahi hi. Khantoh ding hi-a, kiamsuk ding hilo hi. Topa in “mailam hun thupi le lam-etna” (tg. 11) hong pia hi. -- David McCasland

Topa, ka thei, kei na hoih sem thei pa khat zong hi ing.
Kei hong khel inla, nang hong telsak inla,
nang tawh teltakin hong kimusak in. Na thahatna vanglian hong guan in.

Kikhakcipna in khantohna ding thupi piangsak zaw hi.

OMPIH

Posted on Thursday, December 26, 2013by
December 26
 Laizing


OMPIH

SIMDING:
Job 2:3-13


Amah tawh ni sagih sung tawntung tukhawm uha, ama’ thuakna lianlua ahih manin kuamah in paupih lo hi.___Job 2:13

KUMTAWN LAI SIANGTHO:
 Haggai 1-2
 Mangmuhna 17

Conecticut sang khat ah naupang 20 le zum nasem 6 a kithah zawh ciangin, gammite linglawng uh hi. Mi khempeuh in bang hang hi ding cih thei nuam tek uh hi: A bangci bang mi peuhmah in hih hidinga, bang deihna hi ding hiam? Tua bang a pianloh nadingin bang sem thei ding? A suaktate e, bangci don theih ding? Tua bang kawmkal panin, na lamdang mahmah a sem na om hi.

    Chicago panin ui pawl khat hong pai uha - tua uite in pen bangmah dang hih tuanlo-in mihingte nai-ah va ompih  ngiat dingin a kisin uite ahi uh hi. Pau lo-in, amau gei-ah om den uh hi. Naupang pawl khat bang in tua uite tawh kimawl-in a genkhiat theih loh uh dahna le launa khempeuh uite tungah va pulaak khia uh hi. Lutheran biakna nasem Tim Hetzner in, “Tua uite kisin dan pen om hit-hiat ding hilel hi” ci hi.

    Job Lai Siangtho sungah i muh mah bangin, mi lungkhamte in kammal khawng zong kisam lo lel uh hi. Amau gei-ah a tu ding mi khat bek kisam uha, amau ciangin a ngai ding, le a kah uh ciangin a kawi ding cih bang kisam zawsop uh hi.

    Pasian in a thupiang khel tuan nawnlo dinga, thuaknate thu a hang zong genkhia tuanlo ding hi. Ahi zongin thu-um midangte’ tungtawnin eite hong hehnem hi (Kol. 4:8).___ Julie Ackerman Link

Mualkuam lak-ah zong hong ompih a,
Zan khuazing zong hong nawk pih,
I lunggim laitak Amah,
I upna in eite mit hong vaak sak. -- D. DeHaan

 Khris’ na nasepna ah tuni-in a thungai dingin zong kiging in.

CHRISTINGLE

Posted on Wednesday, December 25, 2013by
December 25
 Nilai


CHRISTINGLE


SIMDING:
1 John 1:1-7


Tua khuavak leitung ah hong pai-in mi khempeuh tungah a taang hi. – John 1:9

KUMTAWN LAI SIANGTHO:
 Zephaniah 1-3
 Mangmuhna 16

Czech Republic gam le mun tuamtuamte ah, Christmas ni pen “Christingles” cih khat tawh thuah hamtang hi. Christingle cih ciangin lingmaw pum tawh kibanga, leitung a gennopna ahi hi. Tua tungah khuaimei kivak hi. Khaupak san tawh kivial-a, tua in Jesuh’ sisan a gennuam ahi hi. A pang-ah ha-kawm-khoihna ciangneu li tawh singgah nam li kikoih-a, leitung aa om singgah teng a gennopna ahi hi.
    Tua in Jesuh Khris hong paina thu a genkhia thei hilhcianna khat hipah a - khuazing sungah khuavak puak ding le a kisiacipsa leitung ama’ sisan tawh honkhia ding - cih ngimnate ahi hi.
    John’ genna sungah Khris pen leitung Khuavak hi, cingiat hi. Amah in: “Tua khuavak taktak pen zong leitung ah hong tung khina, mi khempeuh a taan khin hi” (John 1:9) ci hi. Khris pen leitung khimzinna a zothal ding bek hilo-a, amah pen “Leitung mawhna a lakhia Pasian’ Tuuno!” (tg. 29) zong hilai hi.
    Ngaihsun dih in! Bethlehem naungeek pen a nungta, sihna a zo Khris hi-a i mawhna panin hong honkhia hi. Tua ahih manin John in, “Amah khuavak ahih manin eite zong khuavak gamtatna banga gamtat ding” (1 John 1:7) gen hi. Ama’ hotkhiatna a ngahsa eite in zong Jesuh tawh Ama’ khuavakna sungah nuamtakin paikhop sawm dih ni.––Bill Crowder
           
Khim khuazing bang lampi;
Amah in hong tan ta;
Kumkhua i lam-et le dahna meipi,
Tuzan-in Nang sungah kimu siangta. Brooks

Hong suak thak Khris naungeek, leitung khuavak le Pasian Tuuno ahi hi.

ZAN DAIDAM

Posted on Tuesday, December 24, 2013by
December 24
 Ninih

ZAN DAIDAM

SIMDING:
Luka 2:1-14


En un, mi khempeuh lungdamna ding thu lamdang kong puak hi.––Luka 2:10

KUMTAWN LAI SIANGTHO:
 Habakkuk 1-3
 Mangmuhna 15

Simon pen Netherlands gam pan US gam-ah lal hi. Azi Kay le a ta thum-te zong US pan suak pan uh hi. Tua ciangin Jenny in Panama gammi Roberto tenpih hi. Bill in Portugal gammi Vania tenpih hi. Lucas in Korea gammi Bora tenpih hi.
    Christmas dawn ding nitakin a innkuan-un kikaikhawm uha, “Dai Dide, Zan Siangtho” pen amau’ kam tek tawh sa ngeingai uh hi. Pasian adingin zong a ngaih mahmah lapi khat hi-a, A Tapa vaidawnna limci mahmah zong ahi hi.
    Tuma kum 2000 lai-in zinkim laitak, tuucingte in tuu cingin gamlak-ah a giah laitak vantung mite in “Lau kei un, mi khempeuh a lungdam sak ding thuthak khat note-a ding ka hong puak hi” (Luka 2:10) ci hi. Tua ciangin vantung mi tampi takte in Pasian phat uha, “Van a sang belna ah Pasian minthang henla, ama’ pahtak leitung mite tungah nopna om tahen!” (tg.. 14) ci uh hi. Khris i Topa, leitung honkhia ding pa, hong suakta hi!
    Pasian hong itna letsong lian a Tapa, tua ni zan khua daidam hun nangawnin zong mi khempeuh ading hong kipiakhia hi “minam khempeuh le gam khempeuh tungah” (Titus 2:11-14; Mang. 5:9-10). “Pasian in leitung hong it luat manin ama Tapa a um mi khempeuh si nawnlo-in a hin’ tawntung theih nadingun a Tapa neihsun a hong piak dongin a hong itna hong lak hi” (John 3:16).––Cindy Hess Kasper

Dai dide! Zan siangtho! Thakhat-in, theih kholh loh,
Tuucingte’ kiim tang pempam,
Vantung pan phatna puakkham,
“Khazih hong suak zo hi! Khazih hong suak zo hi!- Mohr

Vantung kumpi leitung hon ding hong kum ciang, vantung lapi tawh hong tonkhawm hi.

EI TAWH PASIAN

Posted on Monday, December 23, 2013by
December 23
 Nipi Khuavaak

EI TAWH PASIAN

SIMDING:
Matthai 1:18-25

Nungak khat gai-in tapa khat nei dinga, ama min dingin Immanuel kiphuak ding hi. A khiatna in “Eite tawh Pasian hong omkhawm” cihna ahi hi.
––Matthai 1:23

KUMTAWN LAI SIANGTHO:
 Nahum 1-3
 Mangmuhna 14

Ama’ hong om pen kilang phadiak hi. Midangte in bel puan ngeina silh ciat uh hi. Amah’n bel jeans pheituam teeng-in, T-shirt silh a, lukhu khu lai hi. Bucharest Lai Siangtho sangah kikhawm dingin hong pai ciang, Lai Siangtho sangnaupang ahih lam ka thei-a, lamdang ka sa hi. Bang hangin sangnaupang dangte bangin puansilh lo ahiam, cih kei’ dotnop a hi hi. Amin bel ka ciamteh lai bilbel hi.
    Tua hun khit ciangin amah le amah hong kimeltheih hi. Amin ka dot ciangin, amah in “Immanuel” hong ci hi. Lamdang ka sakna hong khang tektek-a, akhiatna na thei hiam, ka cih leh,“Pasian eite tawh hong om khawm” ci-in hong dawng vatse hi.
    Tua tangvalnopa’ thu ka ngaihsun kha theizel a, bangci bangin a nungta tam, cih ka lungngai zel hi. Jesuh in Pasian’ ompihna hong puak mah bangin - “Immanuel... Eite tawh Pasian hong omkhawm” (Matt.1:23) - eite in zong Pasian’ ompihna a pulaak khia dingte ihi hi. Jesuh in: “Pa in kei hong sawl bangin, note zong kong sawl hi” (John 20:21) ci-in kitel takin hong gen hi.
    Hih Christmas ah, eite in Pasian’ hihna a piakhia dingte ihi hi. Ei’ sunga om Pasian pen a mel i kilatsak zawh tak ciang, leitung in theitel pan dinga, tua in Pasian’ itna le hehpihna a ngah nading uh lampi amu uh hita hi.––Joe Stowell
    Kha Siangtho in ka kha hong vaak,
A vangliatna ka nuntakna hong len,
Ka thungetna, ka deih pen in,
Jesuh tawh kisuun theih na’ng. --Chisholm

Pasian’ letsong nang sungah hong omna in, leitung ah na piak ding letsong lianpen ahi hi.

A LAMDANG CHRISTMAS

Posted on Sunday, December 22, 2013by
December 22
 Nipi  ni

A LAMDANG CHRISTMAS

SIMDING:
1 Khangtangthu
16:7-13

Ama’ sepsa na lianpite phawk tawntung un.
___1 Kumpite 14:8

KUMTAWN LAI SIANGTHO:
Micah 6-7
Mangmuhna 13

Lai Siangtho sang ka kah lai-in, ka innkuan-un ka ciah nading vanleng ticket hong kileisak hi. Ka lenkhiat madeuh a nitakin, a kigawm-in $20 khawng bek ka neihlam uh ka kithei uh hi. Mawtaw khawlna, kikawmna, le thu tuamtuam tawh $20 pen a beipak ding hong hiziau hi. Tua ahih manin thu ka ngen uh hi. Ka naupangte uh zong khat pen kum 6, khat pen kum 2 pha-in, amau tawh zong thu ka ngen khawm uh hi.
    Thu ka nget laitakun, ka kongkhak lam-ah hong pai kheging ka za uha, tua khit ciangin kongkhak nuai a awnna panin lai-ip khat hong kithun phei takpi hi. Tua lai-ip sungah $50 na kikoih a, kua hong piak hiam, cih ka theizo kei uh hi.
    Kum 6 apha ka tanuno in a muh ciangin lamdangsa-in, amah ka muh ciangin zong lamdang ka sakna hong khang sem lai hi. Ama’ lungsim sungah Pasian in lai na gelh a, tua hunlian-in lai-ip ka ngahkhak uh zong a kituak lian thu lamdangpite ahi hi. Eite in zong David bangin “Ama’ vangliatna khutmate i gengen ding hi!” (1 Khang. 16:9).
    Tua mah bangin a masa Christmas zan-in zong vanglian Pasian in mihingte’ lungsim sungah hong suah masak lai-in, mawhmaisakna le itna lian eite in lamdang i sa hi. Khris hong suahna pen mihingte’ thunget lunggulh  pen khat hi-a, itna le mawhmaisakna hong pia hi. Tua bang ngaihsutna na lungsim sungah hong suak ngei hiam?—Randy Kilgore

Topa, Christmas lungdamna lamdang hong guan in,
Jesuh ka muh ciang ka lunggulhna khang hanhan;
Tuani-a ka  ngahkhak lungdamna hangin,
Tua tangthu ka gengen nuam hi.

Christmas ii Khris pen i theih taktak ciang, lamdangsakna pen eite nuntakna ah hong kidim hi.
Subscribe to: Posts (Atom)